بسم الله الرحمن الرحيم
الرخصة و ما ادراك ما الرخصة ............ .
اذا كنت تسوق و ما معك رخصة رح طلع لك وحده احسن لك :) , قبل لا اطلع الرخصة كنت اعيش في فلم رعب , و العسكري له هيبته , ما كنت اخرج كثير بالسيارة , ما ارح أماكن بعيده , و اذا بروح مشوار ولا شيء لازم اخذ اي احد من اهلي عشان لا يوقفني العسكري XD , و.... و ..... و اشياء كثير كنت صعب اسوها بس لما طلعت الرخصة .
اوووه قدرت اسوي اشياء كثيرة , ارح مكان ما ابي , البقالة اللي بجمب بيتنا ارح له بالسيارة , اخرج بدون ما اخذ اي احد من اهلي , السعكري معد صار له اي هيبه مثل اول , اسعى و امرح في ارض الله الواسعه :) .
في البداية كنت متردد و معرف اطلع رخصة ولا ؟! , ارح مع من ؟! , لازم ولي امري ولا ؟! , من وين اطلعها ؟! , و اذا بطلعها اطلعها وقت الدراسة افضل عشان لا يكون فيه زحمة و لا ؟! , طيب كيف اغيب عن المدرسة يعني ؟! ...... اسئلة كثيرة كانت تجي ببالي .
حتى جاه ذاك اليوم اللي انا و اصدقائي قررنا نطلع رخصة مع بعض , قلنا نغيب او نستاذن من المدرسة موب مشكلة , و اتوقع اننا غبنا وقتها , اللي قراروا انهم يطلعون رخصة معي ثلاث يعني كلنا اربع , قبل لا اروح عشان اطلع الرخصة , سألت ابوي وش احتاج و كذا , قال لي كل شيء تقريبا و من بينها فئة الدم , ابوي قال لي عادي موب لازم تروح تشوف وش فئة دمك قل لهم اي شيء عادي بيمشونك , انا قلت لا بروح اشوف فئة دمي احسن .
اليوم الاول :
رحت انا و اثنين من اصدقائي , رحنا مع بعض لاقرب مستوصف لنا , فتحنا ملف و دفعنا الفلوس و كل شيء , المستوصف كان فاضي ما فيه احد كثير , دخلنا بسرعه , و هناك قبل لا ندخل جلسنا نقول من يدخل اول , عشان يقول لنا وش صار معه ؟! و اذا كان سليم او لا XD , عن نفسي ما انكر اخاف من الابرة شوي , كنت ثاني واحد حسب ما افتكر , المهم دخلت كنت متوقع بيسوون شيء شيء , بس طلع في النهاية بس يجرحون اصبعي و ياخذون دم شوي وبس , بس صراحه اعجبت بلون دمي XD .
اليوم الثاني :
في اليوم الثاني رحنا عالصبح و كان المكان فاضي نوعا ما , لانه كان يوم وسط اسبوع , يعني اغلب الطلاب مداومين و غير كذا اساسا المكان او الفرع اللي رحنا له ما يكون زحمة لانه بعيد شوي , دخلنا خلصنا اوراقنا و كل شيء , كان فيه اختبار لقوة النظر بس كان عادي ما فيه شيء , بعدين اختبار القيادة , اختبار القيادة فيه ثلاث مستوايات كل مستوى بحرف , اذا اخذت :
1- المستوى الاول ( أ ) " مبروك عليك ما بقي لك الا الاشياء السهلة " .
2- المستوى الثاني ( ب ) " الله يعينك تدفع مبلغ و تدرس اسبوع عندهم " .
3- المستوى الثالث ( ج ) " بعد الله يعينك تدفع مبلغ و تدرس اسبوعين او شهر " .
عن نفسي كنت متوقع اخذ المستوى الاول بس .... الله يسامح العسكري ... اخذت المستوى الثاني يعني ادفع و ادرس اسبوع بعد :"( , قلت مستحيل وش اللي يخلني اجي هنا لمدة اسبوع مشوار حاولت اكلم ذا و اكلم ذا , صراحه ما كان عندي واسطة " واسطتي كانت ربي " واحد قال لي " رح عند الرائد وكلمه , عاد انت و حظك الله يعينك " , قلت طيب بحاول رحت اول مره ما رضي :( , رجعت لأصدقائي وقالوا لي حاول معه ثاني , رحت له ثاني وقلت له " انا اسوق من اول , بس عشان كان بجمبي العسكري توترت , و وكيل مدرستي عصبي ذلحين بيخصم علي درجات .... " و من ذا الكلام , الحمدلله الرائد كان طيب و قال لي رح عيد الاختبار , رحت عدت الاختبار و نجحت الحمدلله :) .
اليوم الثالث :
اليوم الثالث ما كان فيه شيء كثير بس تختبر فيه اختبار عن الاشارات اللي بالشارع و بعدين تجي يوم ثاني و تستلم الرخصة :) .
شيء غبي صار :
فحص الدم انضحك علي انا و اصدقئي دفعنا فيه اربعين ريال للشخص بينما احد من اصدقائي الاخرين دفع 15 ريال .
شيء يقهر شفته :
العساكر : كان فيهم اساءة لمعاملة الاجانب بشكل كبير جدا حسبي الله عليهم , يخلونهم يدفعون فلوس اكثر , ما يعطونهم المستوى الاول , اصلا مستحيل الاجنبي ياخذ المستوى الاول الا اللي عنده رخصة من دولة ثانية , كلهم ياخذون اما المستوى الثاني او الثالث , حسبي الله عليهم يعني مدري هم شايف الاجانب موب بشر مثلهم ؟! :\ , حتى " الرائد " صح جزاه الله خير ما قصر معي , بس حتى هو كان يسئ للاجانب , و اللي يخلني مقهور كذا لانه واحد من اصدقائي كان أجنبي , شفتهم يسؤون له و ما كان بيدي اسوي اي شيء حسبي الله ونعم الوكيل .
النهاية ............. .
ليست هناك تعليقات:
إرسال تعليق