بسم الله الرحمن الرحيم
اووووه يا ما سويت اكشن في البيت XD , اكشن درامي , اكشن خرافي ..... , جميع انواع الاكشن , و كل يوم اطلع باكشن غير , ذا الاكشن اللي حاكتب عنه اكشن سويته قريب قبل كم يوم تقريبا .
بعد ان امضى شهر العسل مع زوجته , اراد ان يفاجئ زوجته بباقة ورد و بعض من الاشياء التي قد تمنتها زوجته , قبل ان ياتي الي المنزل باسبوع ارسل لي خططه و كيف يريد ان يفاجئ زوجته , لقد كانت مهمة في غاية السرية ( هنا انا ابدع XD ) و انا اخبرته ان سرك في بئر لا تقلق ولكن للاسف ....... .
ارسل لي الخطة و كيف بيسوي وكذا يعني المهم اتفقنا خلاص و كل شيء تمام حتى جاء وقت التطبيق ......... , الخطة كانت اني اروح اجيب باقة الورد و شيء ثاني المهم الاكشن كله صار في باقة الورد ذي , انا دائما قبل لا اخرج من البيت اقول لامي و ابوي اني خارج و اقول لهم وين رايح ,في ذاك اليوم ما قولت لهم وين رايح , المهم في الاخير قدرت اخرج من البيت , رحت استلم باقة الورد , وصلت المحل اعطيته الفاتورة قال لي اجلس هنا انتظر شوي المفروض انتظر بالكثير خمس دقايق , انتظرت ..... انتظرت شغلت لعبة فلابي بيرد ( Flappy Bird ) .... وانتظرت ( المشكلة بطارية الجوال كانت ضعيفة :( والرواية اللي اخذتها معي نسيتها في السيارة ) رجع لي قال لي اللي يسوي الباقة حقتك كان نايم فانتظر اكثر شوي انا عصبت وقتها بس مسكت نفسي , المهم انتظرت حتى جاب لي الباقة وشفت الرجال اللي سوه لي الباقة وجهه كان مفقع يعني من جد توه صاحي من النوم , المهم اخذت منه الباقة و ارتحت شوي لما شفت وجهه XD .
رجعت البيت و بحط الورد في الثلاجة بس طبعا بدون محد يعرف , طلعت البيت اخذت كاسة كبيرة عشان احط فيها ماي و احط الباقة فيها , امي انتبهت لي حاولت معي عشان اقول لها وش فيه بس ما قولت لها , كانت بتصلي , و اخوي الصغير انتبهي لي ( اخوي الصغير يا ان فيه لقافة غير طبيعية XD ) , نزلت شقة العريس عشان احط الورد في الماي و احطه في الثلاجة , الشقة كانت ظلمة ما اشوف شي ابد , و انا بروح لمفاتيح النور قعدت اتحسس وش فيه قدامي ما حسيت انه في شيء ولا شوي ما احس بنفسي الا و انا طايح على طاولة قزاز , اول شيء شلت همه الطاولة , ما شفت اذا انجرحت او لا , اكيد لان الطاولة اهم مني XD , المهم انكسر القزاز اللي على الطاولة الشيء اللي استغربت منه اني ما انجرحت الحمدلله من القزاز XD , ما صدقت حسيت كاني رجل خارق , حطيت الورد في الماي والثلاجة خلاص يعني الجزء الاول من المهمة انتهى الحمدلله بسريه حتى تلك اللحظه :) .
طلعت فوق عند امي , و هي تسألني ها وش جبت وش سويت وين روحت , ما قولت لها اي شيء , و جاء اخوي الصغير قلبه كذا يحكه الا ولازم يعرف وش جبت انا , قال لامي شكله جاب معه ارنب ( لانه من اول لي نفس في الارنب ) طلع السطح دور يمين يسار ما لاقى شيء , و في ليلتها اختي ( الصغيرة بس اكبر مني XD ) كان عندها زواج صحبتها و بتروح متاخر , انا قلت خلني استغل الوقت و اخرج مع اصحابي شوي , خرجت و قعدت معهم شوي , ولا شوي ابوي يتصل علي يقول لي انت كسرت الطاولة ؟! , قلت له ليش وش فيه ؟! , رجع كرر سؤاله , في الاخير اعترفت له , قال لي ليش ما قولت لنا نحن ظلمنا اخوك حسبناه هو اللي كسرها و كذا فجع في ابوي , خلصت المكالمة و اسحب على اصحابي و امشي بسررعه عشان على الاقل اقدر اسوي اي شيء .
رجعت البيت بعد الاتصال يمكن بعشر دقايق , طلعت البيت و لا اشوف ابوي بيتعشى و الوضع في البيت هادي جدا ولا كانه صار شيء , ( طلع ابوي ضحك علي :( ) , واللي انقذ الوضع اختي الكبيرة البطلة رجعت البيت في الوقت المناسب كان عندها اختبار و كذا المهم هي اللي قالت لامي وابوي انه انا اللي سويت ذا كله قبل ابوي لا يتصل على اخوي و يخاصمه :) , بعدها تعلمت درس في ذا البيت ما في شيء اسمه خطة سرية ولا مهمة سرية و لا شيء من ذا الكلام الفاضي و انه كل شيء بينكشف بسرررعه جدا , و لو خليت كل شيء مكشوف محد بيدري عني XD .
اما الجزء الثاني سويته و انا معلن عن كل شيء حتى وريتهم وش هو و كيف و متى طلبته ما بقيت سؤال الا وجاوبته طبعا الا السعر XD .
النهاية .......
الموضوع الجاي حاكتب عن " قياس و حكايتي معهم " .
ليست هناك تعليقات:
إرسال تعليق