بسم الله الرحمن الرحيم
القدرات شيء جدا غبي و حرامي و كل شيء , بس صراحه له داعي شوي عشان يكون فيه فرق بين الغبي و الدافوور , في البداية كنت اسمع انه الاختبار صعب و كله حظوظ و كذا بس انا موب مقتنع انه حظ و كذا , في ثالث متوسط كنت ابغى اسجل فيه ( من الدفرة الزايدة عاد XD ) عشان على الاقل اجربه و اشوف كيف الوضع , دخلت ابحث و كذا عشان اسجل بس اكتشفت انه ما فيه في المتوسطة , رحت الثانوية وراح عن بالي القدرات و همه , قبل ما يبدا التسجيل للاختبار ذكرنا المرشد ( جزاه الله خير ) انه ترا التسجيل بيبدأ الاسبوع الجاي .
اول اختبار :
في اول اختبار ما كنت ادري عن اي شيء بس مدرعم المهم سجلت في صباح يوم الخميس ( سجلت يوم الخميس عشان لا اضيع يوم دراسي :) + وقتها الخميس كان اجازة ) و ما كان فيه اي احد من اصحابي و كنت اسمع كل الناس تقول اول اختبار رح بدون ما تذاكر بس طبعا ضميري ما يسمح لي :") قلت على الاقل افتح اي شيء كذا يعني احاول افهم كم شيء و اروح للاختبار , انا اخذت اخر خميس يعني اخر يوم اختبار , و كنت اسمع اصحابي و الناس يتكلمون اللي قال " والله الاختبار صعب و ما كنت متاكد الا من سؤالين ولا ثلاثة " , واللي قال " والله الاختبار مررررة سهل لو اجيب اخوي الصغير يحله و ياخذ الدرجة الكاملة " وفيه واحد من اصحابي ماشاء الله عليه دايما متفائل حتى لو خبص يقول الاختبار كان سهل و انه جايب الدرجة الكاملة ( ذا اذا خبصت اروح له يرفع معنوياتي XD ) , رحت للاختبار مدرعم محد معي ولا اعرف اي احد , بعد الاختبار مثل كل الناس الابتسامة تشق الوجه و الفرحة في وجه الجميع ونسمع اصوات المفرقعات ( التراطيع ) و جميع انواع الاعياد , عيد الام " اللي يتصل على امه كانه خلاص بينتحر " >>> طبعا ذول الدوافير , عيد الحب " الخاروف يتصل على حبيبته يشتم الاختبار و يخرج معها " و فيه الطيبين " اللي يوزع ابتسامات و حلاويات و كذا " XD , المهم تشوفون جميع انواع الاعياد , اما انا ادق على اخوي ترا انا خلصت تعال خذني :") .
ثاني اختبار :
نزلت نتائج اول اختبار والحمدلله الدرجة تعتبر حلوه نسبيا , و في ثاني اختبار سجلت مع اصحابي و كذا في اول خميس خلاص تم تاكيد الحجز و كل شيء بس ..... , قبل الاختبار بفترة بعد ما اكدت الحجز , دخلت اولمبياد فيزياء , المدرسة اختارت اربعه طلاب اثنين فيزياء و اثنين رياضيات , المهم رحت لاختبار الاولمبياد اختبرت و رجعت بعد بفترة ..... كنت على الجوال جالس اكلم اصحابي ولا شوي كذا تجي لي رساله مضمون الرسالة كانت " اني نجحت في الاولمبياد و اتاهلت :") " , المهم انا ما ستوعبت في البداية , بس بعدين استوعبت , انبسطت و كذا يعني ونشرت الخبر " والله انا دافور محد مثلي XD " , الاولمبياد كانت في القصيم المهم رحت كملت اوراقي و اخذت التذكرة و طلع العوده في نفس يوم اختبار القدرات , و انا ما كنت بأجل الاختبار عشان اصحابي وكذا , المهم ما أجلت الاختبار و دورت لي واسطة عشان اقدم العودة يصير ارجع يوم الاربعاء , رحت القصيم و كنت حاط في بالي انه مستحيل اخذ درجة في القدرات اقل من الاختبار اللي قبله ,نصحني ولد خالتي وقال لي ترا لازم تذاكر و كذا وانه ممكن تنزل درجتك بس انا طنشته و ما ذاكرت تمام , رجعت الاربعاء في الليل وثاني يوم في الصباح اختباري رحت للاختبار قابلت اصحابي وكذا , بعد الاختبار مثل كل مرة الشعب كله مخبص و جايب العيد .
ثالث اختبار :
بعد ما شفت نتيجة ثاني اختبار اتحطمت لانه كانت درجة نازلة اقل من اول اختبار المهم صيرت نفسية انه ليش انا نزلت و كل اصحابي اعلى مني وكذا , في ذا الاختبار شديت حيلي و اجتهدت وذاكرت ...... ذاكرت ..... ذاكرت بس كنت أذاكر وكنت نفسية جدا كئيب في البيت , في المدرسة , بس في المدرسة شوي مو كثير وفي الاخير الحمدلله جبت درجة حلوه حقت المذاكرة يعني :) , >>>> ( ما قلت لكم احيانا لما تصيرون نفسية شيء حلوه XD ) .
اخر اختبار :
في ذا الاختبار عادي ما ذاكرت شيء كثير مع انه كنت اطمح اني اجيب اكثر من الاختبار اللي قبله بس ....... رحت للاختبار على المذاكرة حقت اول و ما اهتميت كثير في ذا الاختبار بس سجلت فيه كذا و خلاص , و النتيجة طبعا مخيسة :( .
فؤاد الاختبار :
1- تتعلم طرق حل سريعه تستفيد منها في المستقبل .
2- تغيب يوم قبل الاختبار و يوم الاختبار و يوم بعد الاختبار XD ( طبعا على حسب المدرسه , مدرستي كانت حلوه الحمدلله تعذر الطلاب )
كنا نستأذن انا و واحد من اصحابي من المدرسه على اساس اننا بنذاكر و كذا ولا بنروح لمكتبة جرير نشتري كم كتاب , و نحن اصلا كذابين كل واحد بيروح بيته و ينام XD , احيانا الوكيل كان يعرف اننا نكذب بس يطلعنا :") .
نصائح بسيطة :
1- استغل كل الفرص عشان تاخذ اعلى درجة .
2- اشتري اشهر الكتب و موب شرط انك تخلصها اهم شيء انك تشوف المسائل وتحلها و تعرف طرق الحل و تاخذ الانسب .
3- في موقع اسمه " بوابة يزيد التعليمية " كثيرين ينصحون به , بس انا دخلته مره وحده و كرهته فجع في بس XD .
4- اتمرن على الحل السريع , ترا كل الاسئلة اللي في الاختبار لها اكثر من طريقة , طريقة سريعه وسلهة و طريقة طويلة وصعبه .
** للمعلومية ترا الاختبار ست اقسام حسب ما اختبرت انا و اخر اختبار لي كان خمسة , كل سؤال له تقريبا دقيقة + اختبار القدرات يبدأ من ثاني ثانوية .
يتبع ........
الموضوع الجاي ان شاء الله حاكتب عن " قياس و حكايتي معهم #2 " .
ليست هناك تعليقات:
إرسال تعليق