عائلة مجهولة

بسم الله الرحمن الرحيم 

 في البداية لم تكن العائلة مجهوله بل لديها ما يثبت اسمها و نسبها ولكن في يوم من الايام .......... .

     في المتوسطة سنة ثالث متوسط اتوقع يقولون عليها ( كفائة ) المهم استأذنت  من المدرسة بعد معاناة حتى ما افتكر اذا غبت او لا المهم كنت بطلع الهوية الوطنية تعرفون عشان بحس اني كبير و حركات و كذا , المهم اخذت معي الطلبات حقتهم صور شخصية , تعريف من المدرسة , و اهم شيء بطاقة العائلة , حطيتها كلها في ملف اخضر علاقي حسب طلاباتهم , وقتها كنت فرحان معرف ليش بس يمكن لانه شيء جديد , كنت قاعد العب بالملف اوديه يمين يسار ارفعه فوق و انزله و كل شيء داخله , المهم رحت مع اخوي الكبير اخذنا رقم و انتظرنا المهم قعدنا كثير شوي رغم انه كان يوم دوام بس كان زحمة شوي , بعد ما انتظرنا و جا رقمنا , الرجال قال لي لازم ولي امرك قلت له اخوي معاي قال لا لازم ابوك ولي امرك حاولت معه من هنا ولا من هنا ما رضي حسبي الله عليه , شي يقهر , يعني غير ان الوقت اللي انتظرناه نكد علي .

     في السيارة و نحن ماشين خلاص راجعين البيت ولا شوي اخوي يقول لي فين بطاقة العائلة معك ؟! , قلت له اكيد وين بتروح يعني , المهم فتحت الملف الاخضر الغبي ما لقيت البطاقة رغم انها كبيرة يعني بس وين راحت معرف ( اقصد كرت العائلة القديم الكبير ذاك ) يعني على الاقل لو طاحت كان انتبهت لها انا او اخوي , نزلنا من السيارة ندور تحت السيارة الطريق اللي مشينا فيه دخلنا المبنى سالنا الناس اذا شافو شيء او لا , سالنا الرجال الشرير ( اللي قال لازم ولي امرك ) , ما لقيناها , فاصبحنا " عائلة مجهولة " , قلت لأمي فجعت في و صاحت علي انت ما تشوف ... انت ليش تلعب بالملف .... انا قلت لك لا تحط البطاقة داخل الملف خذه في يدك .......... المهم صاحت في كثيير , انا وقتها قلت اذا هذاه امي اجل كيف ابوي ......... .

      بعد ما صاحت امي علي ما صار لي وجه اقابل ابوي لانه ابوي عصبي اكثر من امي بشوي , رجع ابوي من الدوام ما قابلته ولا سلمت عليه حبست نفسي في الغرفة , عرف ابوي بالموضوع , اتغذا و خلص غذا جا لغرفتي دق علي الباب , انا كنت مقفله , سويت نفسي كاني نايم ما رديت عليه , دق مرة ثانية و قال "ادري انك صاحي قوم افتح الباب" المهم قلت له طيب فتحت الباب و ما طالعت في وحهه ورجعت جلست على السرير , هزأني شوي بعدين سالني وين ضيعت كرت العائلة ؟! , ماقلت له الحقيقة الكاملة اللي هي اني كنت العب بالملف و كذا قلت له ضاع معرف وين راح المهم قعد معي شوي بعدين خرج , كنت دائما بعد صلاة العشاء اقابل ابوي و اسلم عليه و اساله اذا خارج مكان او لا , بس ذيك الفترة لا شافني و لا شفته كنت اروح اصلي و ارجع بسرعه عشان لا اقابله .

     ثاني يوم بعد ما ضيعت كرت العائلة : دق علي ابوي في الظهر بعد الدوام اول ما شوفت انه ابوي المتصل خفت قلت الله يستر , هو اصلا نادرا يدق علي , المهم طنشت الاتصال انا , ولا شوي يدق علي ثاني استحيت و رديت , اول شيء قاله لي " ليش ما رديت " كذبت عليه و قلت له اني ما انتبهت كنت مشغول , قال لي : " لا تعيدها فاهم " وسالني كم سؤال كذا و خلاص عدت المكالمة على خير الحمدلله :") .

     عادتا امي تسالني بعد ما ارجع من الدوام تحط لي الغذاء او لا بس في ذيك الايام كنت اقفل باب الغرفة على نفسي لا امي ولا ابوي يدرون عني ولا انا ادري عن احد >>> حسيت وقتها كاني مرتكب جريمة ولا شيء :"( , امي تطبخ او ابوي يشتري الغذاء ما ينادون علي ولا شيء اخواني كانو يقولون لي تعال بس انا كنت اقول لهم لا بعدين اكل , موب جعان انا , المهم و اخوي الصغير هو اللي كان يجيب لي الاكل و كل شيء ^^ .

    بعد ما طلع ابوي بدل فاقد لبطاقة العائلة كرهت شي اسمه هوية و طنية , ولا اللي يقهر اكثر بعد الصورة الشخصية شينه مثل وجيههم حسبي الله ونعم الوكيل .

    بس بعدين رحت مع ابوي و انا هاجد و اسبسب فيهم , المهم اضطريت اني اطلع الهوية و مثل العادة الصورة بايخة و احسها بصمة عار في حياتي استغفر الله XD , و صارت ال" عائلة مجهولة " ذكرى حلوه و كل ما افتكرها احس اني واحد غبي .

*** ترا امي و ابوي طيبين وهم اصلا ما هزاؤني ولا شيء بس انا كنت احس انهم كذا ( الله يحفظهم و يخلهم لي ^^ ) .

   النهاية ........


الموضوع الجاي حاكتب عن " السوق " .