بسم الله الرحمن الرحيم
بداية الهوس :
قبل عشرة سنوات تقريبا لما كنت ثالث ابتدائي , كنت انا و اخوي مشتركين في غرفة وحدة , هي كانت بداية الهوس , كان اخوي اللي اكبر مني دائما ينظف الغرفة و يرتبها و انا كنت اقول ليش ما اسوي انا كمانة مثله , قدوتي تعرفون عاد XD , المهم رحعت من الدوام قبل اخوي و كانت الغرفة وصخه المهم كلمت امي وسالتها وين المكنسة ...... روحت اخذتها و كنست الغرفة و استنيت اخوي بفارغ الصبر عشان اشوف ردة فعله , جا اخوي من الدوام قلت ها : ما تحس انه في شي غريب ؟! , قال لي لا , قلت له ترا نظفت الغرفة و رتبتها قلت له و انا متحمس و مستعد انه يمدحني و لكن .......... طالع في كذا وقال لي من جد احس انه الغرفة مثل ماهي و قال لي شيء حطمني اكثر ...... تنظيفك مثل تنظيف الشغالة :"( , طبعا اتحطمت و زعلت وكرهت نفسي انا تنظيفي مثل تنظيف الشغالة لا مستحيل , تعرفون عاد انتم كيف الشغالات ينظفون اي شيء ( الا من رحم ربي ) , فقلت لنفسي انا لازم اكون احسن من اخوي و من الشغالة , المهم و بدأ الهوس , صرت اقول لنفسي : انا محد ينظف احسن مني , انا احسن واحد في التنظيف , حتى صرت اراقب الغبار وين ينزل و اروح امسحه XD , قعدت على ذي الحاله فترة طويلة شوي .
الغبار :
هذا الشيء عدوي و صديقي في نفس الوقت بس هو عدوي اكثر من انه يكون صديقي ما استفدت منه الا في شيء واحد بس " السيطرة على الغرفة " , الغبار شيء جدا متعب , في كل مكان يكون , في كل وقت يتجمع , مهما حاولت اني اتخلص منه يرجع ثاني , واللي يقهر اكثر احس انه يبحث عن الاماكن اللي صعب انها تتنظف و يتجمع فيها , سبب لي عقدة نفسية , شيء مرره اكرهه , استغفرالله احس ما له داعي في الحياة , ودي اعرف له فايدة وحده على الاقل :( , المشكلة انه انا عندي حساسية منه , يعني لو دخل في خشمي يعدمني ازكم يلتهب حلقي ........ , فصرت احاربه اسبوعيا اتلثم اخذ جميع انواع المنظفات معي و .... و.... احس كأني داخل حرب XD .
الترتيب :
هذا الشيء اموت فيه بدونه ما اقدر اعيش لازم منه , اسويه في كل شيء في الحياة , ارتب الملفات في جهاز الكمبيوتر , ارتب الالعاب , الكتب .... , اما بالنسبة للمكتب او السرير , الاثاث بشكل عام يا انه يكون بشكل مستقيم تمام او انه يكون بزاوية و اذا اي احد حركه اعصب , برضه هذا الشيء ساعدني في اهم حاجه " السيطرة على الغرفة " و انا عن نفسي مهوس بالترتيب اكثر من النظافة .
امتلاك غرفة و محاولة السيطرة عليها :
كبرنا و مرت الايام و السنين و صار اخوي في غرفة لحاله و انا و اخوي الصغير في غرفة لحالنا , المهم انا قلت خلاص دحين اقعد انظف و ارتب براحتي و بكيفي , اخوي الصغير ما يمديه يقول شيء , صرت انظف الغرفة كل اسبوع او اسبوعين تقريبا , و المشكلة انه اخوي الصغير قليل ادب ياكل بسكوت او حلاوة ما يرميه لا يدسه تحت الفراش , تحت البساط اهم شيء كذا ما يرميه و اذا جيت اساله و احاسبه يقول لي : نسيته , و كنت دايما اعاني من هالشيء , تعبت من كثر ما اقول له و ما يسوي شيء , طفح الكيل قررت اني اسطير على الغرفة , اخوي الصغير ما يحب لما انا ارتب الغرفة لاني دائما لما ارتب الغرفة اطلع كل شيء من الغرفة و ما اخلي احد يدخل الغرفة و اخذ وقت مررره كثير , اول ما ابدا اكنس بعدين اخذ لي راحه اقعد العب اكل و اي شيء ....... ارجع امسح كم شيء و اخذ لي راحه و كذا يوم كامل تقريبا انا ما عندي شيء اخسره بس اخوي الصغير كل اشيائه في الغرفة و انا ما اخليه يدخل ( يستاهل عشان ثاني مرة يتعلم و شيل قمايمه ) المهم وقعدت على ذي الحال لفترة , اخوي كان متحملني الى ....... جاء يوم عج غبار و كذا بداية الاسبوع و انا اخر مرة نظفت الغرفة نهاية الاسبوع اللي قبله يعني بينهم يوم بس , اخوي كان جالس يلعب و مبسوط قلت له يلا بنظف طالع في كذا وهو زعلان , المهم حاول يمين , يسار , قلت له لا تحاول بنظف يعني بنظف , المهم عصب و زعل و شال اشيائه وهو ساكت كنت اساله ايش بتسوي ما يرد علي , بعد ما اخذ اشيائه دخل عندي وقال : خلاص والله معد لي دخل في الغرفة هذه خذه لك انا اروح اقعد في الصالة احسن لي , طفشتني كل شوية تقول لي بنظف و انظف , انا وقتها كنت اضحك بس ما همني اهم شي اني حققت هدفي XD .
اخوي الصغير ما قدر يقعد في الصالة كثير قلت له تعال ارجع الغرفة عادي ( طبعا مجاملة ) بس هو ما صدق رجع الغرفة بس قلت له ترا ح انظف كل اسبوع تقريبا ما تزعل مثل اول >> على اساس انه يتراجع بس لا قال لي طيب :( ...... مرت الايام و الاسابيع و اخوي اتعلم خلاص صار يشيل قمابمه معه يعني اتادب شوي XD , بس بعد فترة هو طلع لحاله مو بسبب اني انظف كل شوية بس انا ما احب احد ياحذ شي و ما يرجعه مكانه كنت اقله مرة و مرتين و ثلاثة حتى طفش مني و صار يقول لي " انت الحياة معك صعبة " و مشي خرج من الغرفة للمرة الثانية و الاخيرة ^^ , و ماصار يدخل الغرفة الا شوي بس و يطلع و صار اي شيء ياخذه يعلمني ويرجعه صار "اخلاق" XD , كانت الغرفة باسمي و اسمه بس بعد ما طلع منها صارت باسمي >>> هنا خلاص امتلكت الغرفة ^^ .
اخوي الصغير بعد ما خرج من غرفتي ما صار عنده مكان يقعد فيه و شيء اكيد انه صار مستحيل يقعد معي , المهم اخوي الكبير معد صار يهتم بالتنظيف و الترتيب مثل اول , كانت فرصة لاخوي الصغير انه يقعد مع اخوي الكبير وفعلا استطاعو العيش معا XD , و الحمدلله انا صرت في غرفة لحالي و هم مع بعض , بس لو دخلت لغرفتهم القاها فوق تحت مررره مهي مرتبة بس اهم شي انه انا مرتاح و هم مرتاحين ^^ .
النهاية...........
الموضوع الجاي حاكتب ان شاء الله عن " عائلة مجهولة "
ليست هناك تعليقات:
إرسال تعليق