بسم الله الرحمن الرحيم
في البداية كنت اريد ان اطلق عنان موهبتي في التصوير في الجامعه , قابلت واحد من أقاربي في نفس جامعتي وسألته وش فيها الجامعه من نوادي و كذا , وقال انه في الجوالة وفي .......... و........... المهم حمسني وقال انه حيكون في سفرات دولية و كذا المهم انا مرة اتحمست و اخوي كان يقول لي خلك بعيد من ذي الاشياء احسن لك , و انا مثل العادة اطنش و اكل تبن في النهاية , المهم ماسمعت كلام اخوي , رحت الجامعه ورحت للنادي اول مرة بابهم كان مقفل مشيت , ثاني مرة برضه الباب كان مقفل , قلت خلاص ح اروح لهم اخر مرة و اذا كان الباب مقفل خلاص مع نفسهم بس للاسف لما رحت لهم المرة الثالثة كان الباب مفتوح دخلت و كان فيه اثنين وقلت لهم اني بسجل في النادي وكذا , اخذ رقم جوالي وقال لي " ترا الموقع حاليا فيه صيانة اول ما يفتح حنتصل عليك و نخبرك " قلت له طيب خلاص , بعد يوم او يومين كذا اتصل علي وقال لي " خلاص الموقع فتح و تقدر تسجل , وفيه لقاء يوم الخميس " قلت له خلاص ان شاء الله ح اسجل واحضر اللقاء .
يوم اللقاء :
كلمت امي و ابوي وقلت لهم انه فيه لقاء وكذا قالو لي طيب رح , اللقاء كان في الجامعه , ويبدا من العصر الساعه 4 حتى الساعه 11 المفروض يعني يكون حتى الساعه 11 ,رحت للقاء وانا وقتها كنت صائم ( كنت مسوي بطل ماشاء الله علي XD ) الساعه خمسة تقريبا قلت يعني مابقي على الأذان شي اقدر أكمل صيام ولكن ...... ، كنت اتوقع انه حيكون شيء و زحمة و كذا بس طلع عادي ما فيه شيء بالعكس حسيت انهم ماخذين الموضوع بجدية اكثر , يعني في اشياء عادية سخفية بس هم ماخذينها بجدية , انا سجلت في النادي في اليوم اللي قبل اللقاء , رحت للنادي وقلت لهم انه انا جديد و كذا و معرف احد , قالو لي عادي ادخل اي مكان .
النشاطات :
اللعبة الاولى :
اول ما جيت كانو مسوين مستطيل و قاسمينه بالنص طريقة اللعبة كانت انه في كل جهة فرقة مكونة من ستة افراد تقريبا , كل فرقة ترسل فرد من افرادها للجهة الثانية عشان يلمس واحد من الفرقة الثانية ويرجع لجهته اذا قدر يرجع لجهته خلاص اللي لمسه يطلع برا , واذا الفرقة الثانية قدرت تمسكه قبل لا يرجع لجهته هو اللي يطلع برا >>> ادري محد فهم اصلا عادي موب لازم تفهمون XD , وانا اشوفهم ....... اللي يطيح على الارض بقوة و اللي يدفون بقوة ما في الا يكسرون في بعض , انا اول ماشفت انه اللعبة كذا سحبت نفسي انا مرررة موب متعود على الالعاب اللي مثل كذا , انا اتكسر بسرعه و ما اقدر اتحمل الدف و الطيحات اللي مثل كذا , سحبت نفسي حتى خلصت اللعبة .
اللعبة الثانية :
تعرفون ذيك المسابقات اللي فيها رسالة تقول لكم وش تسوون , اللعبة كانت مثل كذا كان في خشبتين طويلة و تحتها الرسالة و كانت تقول الرسالة " اصنعو ناقلة بالخشبتين و بالربطة الكشافية , واحملوا احد افراد الفرقة على الناقلة حتى نهاية الرصيف " المهم وهم يربطون الخشبتين بالربطة الكشافية كانو يسألون عن الاوزان و للاسف كنت انا اخف واحد فيهم وقالو لي اجلس . سلامات !!! وين اجلس و كيف بتشيلوني ؟! , المهم قالو لي كيف اجلس و انا طول الوقت خايف , اخاف انهم ما ربطو الخشبتين مع بعضهم مضبوط و اخاف اني اطيح و اتعور و .... و... , الحمدلله وصلت بسلام و هم ينزلوني قعدت اصارخ اقول لهم نزلوني شوي شوي اخاف انهم يرموني لانهم يبغوني يسبقون الفرق الثانية , بعد ما نزلت قلت لنفسي " ذلحين شكلنا قطعنا مسافة طووووويلة " ولكن .... طلعت كلها خطوتين , كله من الخوف و الرعب اللي عشته XD , بعدها اخذنا الرسالة الثانية و كان مكتوب فيها " اذهبو الى ( فلان ) لكي تحصلوون على الرسالة التالية " , رحنا عند الشخص المطلوب , وقال لنا " الفرقة اللي تخلص التفاحة اول هي اللي تاخذ الرسالة " اخترنا واحد من فرقة بس طلع للاسف من الناس اللي تتذوق الطعم يعني من الناس البطيئة في الاكل , خلص التفاحة و اخذنا الرسالة الثانية " اذهبو الى الساحة الترابية " رحنا للساحة الترابية و نحن نجري جري , وصلنا للساحة الترابية كانت المسابقة , عبارة عن سطل و كاس ويبغون الفرق تملي السطل ماء بالكاس ، و المشكلة انه الكأس كان كأس ورق صغير ، بس السؤال من وين نجيب الماء ؟! , الماء نجيبة من دورة مياه ( اكرمكم الله ) في اخر الساحه الترابية , و المشكلة انه الفريق اللي كنت فيه كان اقل فريق كنا خمسة بس اما البقيية كانو كثيرين , يعني ما حيتعبون مثلنا , و طبعا الفرقة اللي تملي السطل اول هي الفايزة , اللي راح وقعد يشرب ماء و بعدها يرجع و اللي يفصخ فلينتة و يحطها تحت الماء و يرجع ينفضها في السطل , الشغلة كان بيغالها وقت كثير و متعبة و فريقي كانو قليلين ، و انا كنت صائم بس ما قلت لهم , والحمدلله المشرفين قالو لنا " خلاص كذا يكفي انتقلو الى المسابقة اللي بعدها " .
المسابقة اللي بعد ما تملي السطل كانت في خشبتين طويلة , و من كل فرقة اكثر شي 8 اعضاء يربطون ارجلهم في الخشبة و يمشون يعني لازم من العمل الجماعي , و كذا ونحن اول فرقة وصلت الحمدلله و بعد ما وصلنا انا اتفاجات , تعرفون كيف تشوفون في الافلام في المعسكرات يوم يتدربون يزحفون على التراب من تحت شبك , المهم كذا كانت المسابقة بدات بالزحف ما كنت اتوقعه متعب لذي الدرجة بس طلع جدا متعب و بعد الزحف فيه حبال على الأرض لازم اقفز من فوقها حتى أوصل للجهة الثانية و كان فيه حكم قهرني حسبي الله عليه خلني اعيد الزحف ثلاثة مرات ، و آخر مرة تعبت خلاص و فيه واحد قال لي جملة على اساس انها تعطني دفعه معنوية " أن تصل أخيرا أفضل من أن لا تصل " كنت بقول له خلك ساكت أحسن لك " أن تصمت أفضل من تأكل بعضا من التراب من يدي " ، طنشته و كملت خلصت الزحف و القفز بقى آخر شيء اللي هو كذا كفرات على الأرض و تقفز يمين ، يسار المهم بعد ما خلصت منها خلاص جسمي مررة مكسررر ، عطشان ، دايخ ، كنت احس اني بستفرغ خلاص بس بطني ما فيه شيء ، المهم الحمدلله ما استفرغت ، و اللي يقهر أكثر اني فطرت شربت ماء قبل الأذان بنص ساعه :"( .
اللعبة الثقافية :
صراحه ذي اللعبة ما كانت حلوه كثير عادية جدا و حسيت انه فيها غش .
المسرحيات :
أما ذا الشيئ صراحه طلع كل الإبداع فيه ماشاء الله ، هو كان احلى شيء في اللقاء كله .
العشاء :
سمعت بعض الرواد يتكلمون عن العشاء و يقولون " لازم نعرف العدد عشان نجيب العشاء " أول ما سمعت ذي الجملة قلت لنفسي " خلاص العشاء شكله حيكون شيء شيء كذا فخم يعني حق التعب و الرياضة " و أنا كنت صائم يعني خلاص ح أكل في العشاء أكل يكفي لمدة أسبوع XD ..... بس في النهاية استغفرالله يا ربي الحمدلله على النعمه ، قالو لنا كل فريق يطبخ أكله بنفسه ، سحقا ، و لا بعد يقيمون الأكل و يحطون نقاط عليه عشان يحددون من الفريق اللي يفوز .
خاتمة :
المفروض انه كل شيء يخلص الساعه 11 و كانت اقدر امشي في أي وقت بس من الغباء اللي في جلست حتى آخر شيء ، بعد ما أكلت العشاء استغفرالله ، رجعت البيت متأخر الساعه ثلاثة تقريبا و البيت كله كان نايم و الأبواب كلها مقفلة ، اتصلت على اخوي بس جواله مقفل و ما اتصلت على البيت عشان لا ازعج أمي و هي نائمة ، حاولت اني اقتحم البيت مثل الحرامية افك الباب و كذا بس للأسف كل المحاولات فشلت و انجرحت في إصبعي و في الأخير........... نمت برا :( ، كان فيه عند باب الشقة كرسي نمت فوقه مثل المساكين ، اساسا النوم كان مريح و الكرسي صح أنه بعشره ريال بس كان مريح وقتها :") ، و إلى اليوم ذا و جسمي مكسر :""( >>> مثل ما قلت لكم في النهاية اكلت تبن :") .
*** قبل النهاية , صراحه الجوالة موب سيئة ذاك السوء بس تستاهل التجربة , و انا عن نفسي تجربتي كانت سيئة شوي , بس الشباب ما شاء الله عليهم ابدعوا , و كل واحد له تجربته الخاصة :) .
النهاية ...........
الموضوع الجاي أن شاء الله حاكتب عن " لن اعيركم اهتمامي " .
ليست هناك تعليقات:
إرسال تعليق