بسم الله الرحمن الرحيم
انتهى الترم الاول في السنة التحضيرية بسلام , اتعرفت على ناس طيبين الحمدلله و كذا , بدأ الترم الثاني كنت أتمنى لو يكونون الطلاب نفسهم في كل شعبة بس للاسف تغيروا مع الترم الثاني و صيرت نادرا اقابل اصحابي .
مرت الايام والاسابيع في الترم الثاني انطردت من كلاس و اتاخرت و كل شيء حتى اتى ذلك اليوم ............ , حضرت كلاس الفيزياء بدري و جلست و مركزين مع الدكتور و لا شوي على نهاية المحاضرة دخل طالب شكله عادي يعني , طالع فيه المدرس و قال له اطلع برا , المحاصرة انتهت , الطالب بدأ يهرج انجليزي , صراحه ما انتبهت وش قال , و اتوقع الدكتور نفس الشيء , المهم الدكتور دخله قال له ادخل خلاص , في البداية استغربت انه تكلم انجليزي قلت شكله من جد اجنبي وفي نفس الوقت قلت مستحيييل واضح عليه انه سعودي ما يحتاج .
بعد المحاضرة رح للدكتور و بدأ يتكلم معه انجليزي حسيتها لما انحشر و ما عرف يقول كلمة رجع للغة الام اتكلم عربي XD , و بدأ يسأل الدكتور عن الغياب و الحضور و سوا فيها انه مهتم بالمادة , وسأل الدكتور عن اسم الكتب , الدكتور قال له اسماء الكتب بالانجليزي و الطالب جلس يكتب بسرعه ما شاء الله ما ادري هو فعلا كان يكتب مضبوط ولا بس اي شيء ؟! .
بعد محاضرة الفيزياء كان عندنا محاضرة رياضيات , وذي المحاضرة استغفرالله الدكتور يحضر و يجيب النوم و الله , احيانا اكون مصحصح و كل شيء بس لما يبدأ كلاسه خلاص انهار و ابغى انام المرسام يطيح من يدي و اشياء كثيرة , الدكتور جدا ممل , المهم دخلت الكلاس و جلست و ما انتبهت انه الطالب الجديد كان جالس قريب مني المهم سمعت صوته و كان يكلم و احد من اصحابي و انا اعرف صحبي انه ما يطيقه , من اول ما شافه كرهه , الدكتور خلص المحاضرة بعد معاناة , و مثل العادة انا دائما اصور السبورة عشان اذا نسيت شيء ولا شيء , في الحقيقة انا اصلا ما اكتب XD , طلعت جوالي و صورت ولا شوي الطالب الجديد بيسوي انه فله قال لي بالعربي طبعا " ايه بعدين انستقرام و لايك و كذا " , حاولت اني امشيه في الكلام ابتسمت له شوي و سكتت و بعدين نفس الشيء رح للدكتور عشان الغياب و الحضور و الكتب .
تعدي الايام و الاسابيع و انا ما احتكيت به " و يا لها من حياة جميلة كانت " , في يوم كذا مدري وش به وش كان يبغى مني , المهم بس اعطيته وجه شوي و هو ما صدق , من بعدها نشب لي , انا ما ادري ليش كذا اعطيته وجه ؟! , و المشكلة اكثر اللي اعطيهم وجه في الجامعه يطلعون كذا :( , نشب لي يوم ورا يوم ................ , و كل يوم احسه\ كذاب اكثر من اول , يقول لنا انه اخذ الثانوية هنالك في امريكا , و هرجه مثل وجه بنات و ما بنات و انا ما احب ذي الهرجات احسها سخيفة خلها لك موب لازم تقولها للناس , و يقول لي انه تضارب مع عميد الجامعه و ... و ..... و كلامه كثير , و مع الوقت تعرف على كم واحد ثاني والحمدلله بدأت افتك منه شوي .
بدأت اقول الحمدلله افتيكت منه شوي خلاص , خله مع اللي تعرف عليهم هم مبسوطين معه بس مدري وش به ناشب لي , قبل يوم او يومين , كان عندنا كلاس فيزياء و الدكتور قال لنا انه ما في تحضير ولا فيه محاضرة اذا عندك سؤال تعال اسأل , انا مدري وش بي , اتوقع كنت دايخ وقتها , الدكتور كانه يقول لنا لا تداوموا بس انا داومت سحقا , حضرنا انا و كم و احد وللاسف النشبة كان واحد منهم :( , جاه الدكتور اتاخر شوي , جلس و قعدنا ساكتين يمكن نص دقيقة نطالع في بعض , بعدها الدكتور قال لنا اذا ما عندكم سؤال تقدروا تمشون طبعا نحن قلنا عيب نمشي على طول لازم نسأله اي شيء و بدأنا نفتح دفاترنا الفاضية و نقلب فيها XD , و بعدها خرجنا خلاص .
لما خرجنا كان عندنا كلاس رياضيات بعده يبدأ الساعه تسع و نص و الفيزياء خلصنا منها الساعه ثمانية و ثلث , يعني بقي ساعه و عشر دقايق تقريبا جلسنا في المصلى انا حاولت ابعد عن النشبة و طلعت سماعاتي و شبكتها في التاب و خلاص يعني افهمها لا تكلمني فكني من شرك , بس طلع انسان استغفرالله .......... , جلس يكلمني , و اتوقع بعدها بدأ يحس الحمدلله قام و مشي , و انا رجعت دخلت كلاس الفيزياء و قعدت اقرأ روايتي :) .
النهاية .......... .
ليست هناك تعليقات:
إرسال تعليق