يوم جامعي سيء

بسم الله الرحمن الرحيم 

*** صح اعتذر عن يوم امس لم ارفع موضوع لاني كنت بحاله صعبة :"( . 

    اليوم الموافق 3/9 بالميلادي , يوم جامعي موب مثل اي يوم جامعي ثاني , كان عندي في مادة مهارات الاتصال تدريب للإلقاء امام الطلاب و كذا , و اتكلم عن اي موضوع له صلة بالمادة , المشكلة اني اخذت اول يوم و كنت لحالي في ذا اليوم . 

قبل الحدث بأسبوع او اكثر : 

      حضرت متاخر , دخلت الكلاس و جلست ولا شوي واحد من اصحابي يقول لي " ها اخترت يوم عشان تلقي فيه ؟! " قلت " سحقا , وش تقول انت انا توني جاي " ولا شوي كذا واحد يعطني ورقة فيها جدول و ايام و تاريخ كل يوم , سألت الدكتور و عرفت انه فيه تدريب إلقاء و اختار اليوم اللي ابيه المهم قلت بسوي بطل و اخذ اول يوم و اشوف كيف ( كم كنت احمق و قتها ) سجلت في اول يوم و عندي أمل انه في احد بيسجل مثلي في نفس اليوم , الى الان الدكتور ما قال لنا شيء غير انه تتكلم عن اي موضوع و بس , انا قلت عندي موضوع عادي اقدر اتكلم فيه , موضوعي كان " تنظيم الوقت " . 

      بعد ما كتب كل طالب اسمه في الورقة , شفت الورقة للأسف الأمل اللي كان عندي انه فيه احد يسجل في نفس اليوم ...... اختفى الأمل , تبخر , ذهب بعيدا و تركني وحيدا :"( , بس بقي معي أمل ضعيف انه عادي في النهاية بتكلم عن اي موضوع  , وزع علينا الدكتور اوراق مكتبوب فيها وش يبي من الطلاب , شفت تدريب الإلقاء مكتوب انه لازم الموضوع يكون متعلق بالمادة !!!!!! ولا لازم عرض بوربوينت بعد :( , طبعا و هنا من جد اختفى الأمل كله ما عاد صار فيه شيء اسمه أمل و لا خديجة حتى XD ,  ولا شيء من ذي الخرابيط , قلت عادي بحاول ألقى رابط بين موضوعي و المادة فكرت ..... فكرت ....... ! , استغفر الله الافكار ما تجي الا وقت الصلاة , لما كنت بصلي المغرب في يوم الجوالة , جاه الرابط اللي يربط بين المادة و موضوعي كان " انك تصير نفسية XD " قصدي تقعد مع نفسك , تتحدث الى نفسك , تتواصل مع ذاتك . 

 ما بين الحدث و الموعد : 

      في ذي الفترة كنت بس افكر في الموضوع و اتخيل نفسي ألقي , و اتخيل الطلاب موب لابسين شيء XD و اضحك عليهم , ما كتبت ولا شيء بس كنت اسوي كذا اتخيل و افكر في الموضوع و وش اقول , قبل الموعد بيومين تقريبا فتحت البوربوينت كان مطلوب انه نسوي عرض البور بوينت سويت العرض كتبت كم شيء كذا غبي ما عرفت اضبطه , اصلا حسيت كاني بسوي دعاية تعرفون ذيك الدعايات اللي تقول " هل تعاني من .... " المهم انا سويت مثله كتبت " هل تعاني من ضياع يومك دون ان تشعر ؟! " , بس طبعا شيء اكيد حذفته بعد ما راجعت اللي كتبته :) , خلصت البوربوينت حفظته و كل شيء . 

في صباح الموعد : 

    الإلقاء كان الساعه عشرة الصباح , صحيت الصباح , طبعت البوربوينت , و استمتع بصباحي الجميل , و رحت للدوام وصلت بدري قبل الوقت تقريبا بربع ساعه تقريبا , و المشي من المواقف للمبنى ياخذ تقريبا من سبع لعشر دقايق , و لازم يكون فيه شيء يشغلني في ذا الوقت و يأخرني عن الدوام , وصلت للكلاس , شفت اغلب الطلاب برا الكلاس استغربت المفروض يكونون داخل لانه المحاضرة وقتها بدأ , سلمت على كم واحد اعرفه سألت واحد منهم " ما حضر الدكتور ؟! "  قال لي " لا " و انا شوي و اطير من الفرحة لانه الدكتور دائما يحضر بدري , مرت خمس دقايق تقريبا ولا شوي اشوف الدكتور يدخل من الباب :( سحقا , دخل الدكتور و دخلنا وراه جلسنا و كل شيء و بعدها طالع في الدكتور و ابستم ابتسمت له و قال لي " جاهز ؟! " قلت له " ايه عادي في اي وقت " و انا اقول يا رب ينتهي وقت المحاضرة و يصير ما في وقت عشان اطلع :"( . 

 الحدث : 

      بعد ما سألني اذا كنت جاهز او لا , كنت بقوم من مكاني بس قال ح ناخذ المحاضرة اول بعدين انت اطلع , صراحة ارتحت :") , كنت اراقب الوقت متى تخلص المحاضرة كنت ابغى المحاضرة تنتهي و هو لسه بيشرح بس وجع بقي خمس دقايق , قال لي يلا اطلع , طلعت و .........................................  رجعت مكاني , كذا اللي صار بسرعه و ما فيه شيء و لخبطه في الكلام و كل شيء , بعد ما انتهيت , خلاص انتهت المحاضرة وسألت اصحابي كيف ؟! , قالوا انه تمام بس....... وقفتي كانت خطا :( . 

المهم الحمدلله مر الحدث بسلام و بسرعه و بعدها كان عندي اختبار حاسب العملي و كان جدا تافه الحمدلله .

  

  النهاية ............. . 

الموضوع الجاي ان شاء الله حاكتب عن " المكتبة "