الاختبار التحفة #5

بسم الله الرحمن الرحيم

الاختبار التحفة " فيزياء " الدوري الثاني ...... .

   في ذا الاختبار صارت اشياء غريبة , تلخبطت علي القوانين و ... و .... و اغرب شيء كان المكان اللي جلست فيه . 

     نتيجة الدوري الاول ما شفتها و كنت حاس اني جايب العيد شوي فقلت الدوري الثاني ان شاء الله ح اعوض اللي فاتني و ابذل كل جهدي عشان اخذ الدرجة الكاملة باذن الله , ذاكرت و ذاكرت حتى خلاص طفشت و حسيت شوي و اخترع قوانين جديدة خارقة للطبيعة XD . 

المذاكرة :

      بدات المذاكرة و طنشت كل شيء تقريبا في سبيل المذاكرة للمادة , ختمت كل شيء و ذاكرت وذاكرت حتى صيرت افكر اخترع جهاز كيف اخلي الانسان يطير XD .

       اخذت ملزمة لاحد الدكاترة الخصوصين لنفس الدكتور اللي ذاكرت منه في الدوري الاول حسيت انه جيد نوعا ما , مع انه ما احب اخذ نفس الشيء بالعادة , احب اجرب  و اقارن , المهم اخذت الملزمة وبدات في المذاكرة تفاجات انه في تشابتر كامل تقريبا متعلق بتشابتر ذاكرته في الدوري الاول , هو شيء حلوه بس انا للاسف نسيت كل شيء , و كنت في حالة صدمة ما اقدر افتكر شيء كثير منه  .

      المشكلة في الملزمة ما كان كل شيء واضح بطريقة الحل  في اشياء كانت مجهولة , فاضطريت اخذ ملزمة لدكتور ثاني , و تمنيت اني ما اخذت ملزمة الدكتور الثاني , لانه كل دكتور له طريقته , و انا كنت متعود على طريقة الدكتور الاول و يوم شفت طريقة الدكتور الثاني كل شيء تلخبط علي :( , المهم مدري كيف بس الحمدلله خلصت المذاكرة بعد ما تحطمت و كل شيء .

قبل الاختبار :

       ذي المرة رحت مع صحبي هو اللي كان يسوق , قبل لا ياخذني قلت براجع القوانين و كذا , يوم جيت اراجع القوانين كل القوانين دخلت مع بعض , و ما فيه الا تأليف قوانين جديدة XD , و صراحه مررره تحطمت من نفسي و خفت و قلت الله يستر من الاختبار بس .

      وصلنا لمكان الاختبار و انا شايل هم القوانين و المذاكرة اللي مشي حالك و فوق كذا ابي اعوض عن اللي فات , كنت ادري انه القوانين بتجي في الاختبار , بس ما قد استفدت منها  ابد ما غير تلخطبني و بس , قلت دام اني ملخبط القوانين اساسا خلني اجرب يمكن استفيد منها .

وقت الاختبار :

      ذا الاختبار صراحه كان غريب شوي , بالعادة انا ادخل قاعه لحالي و احاول قد ما اقدر اني ما ادخل اي قاعه فيها واحد اعرفه او على الاقل لا يكون قريب مني , ابي ادخل قاعه كذا لا احد يعرفني و لا اعرف احد , عشان لا يقول لي غششني و القلق ذا .\

     في ذا الاختبار كانوا منظمين شوي يفتحون البوابة و يملون قاعه قاعه , بالعادة يفتحون البوابة و يخلون كل طالب يدخل بكيفه , و انا كنت مع اصحابي ودخلنا مع بعض حاولت ادخل اي قاعه بس ما قدرت , ابتعدت عن اصحابي حتى صيرت ما ادري وينهم , دخلت لقاعه و كنت بجلس بالخلف مثل العادة , بس للاسف ما كان فيه مكان قلت عادي اجلس اي مكان خلاص خلني اختبر وامشي .

       شفت صديق الطفولة معي من الابتدائية , وكنا ندرس في نفس المدرسة من الابتدائية حتى الثانوية ونخرج مع بعض و كل شيء , صديقي عمري ومع ذلك ما قد جلست جمبه في اي اختبار نهائيا , بس ذي المرة اضطريت اجلس بجمبه , و هو يعرفني لا اغشش و لا اغش الحمدلله , ويعرف اني اكره ذا الشيء , و هو عادي يغشش , اول ما قابلته سالته " ها وين اخويانك اللي تغششهم ؟! " قال لي " شف هناك " , اول ما التفت للمكان اللي اشر عليه شفت اخويانه يطالعون في بنظره ..... لانهم يعرفوني ما احب حركات الغش و كذا , و اني دائما احاول انصح صديقي و اقول له " اترك عنك حركات الغش و القلق اللي انت موب في حاجه لها " بس ما يسمع كلامي .

       بدا الاختبار , استلمت ورقة الاجوبة و الاسئلة و بدات في تضليل بياناتي في ورقة الاجوبة و نسيت اشغل المؤقت اللي في ساعتي عشان يكون حجتي لو سحبوا مني ورقة الاختبار , بس الحمدلله مشرف القاعه كان طيب و قال لنا " ذلحين يبدا وقتكم " بعد ما ضللت بياناتي :) .

     بدا الاختبار والمشرف من اول يقول لنا " اذا ما لقيت اجابة لسؤالك خلاص راح تاخذ درجته لا تسال وتضيع الوقت " ما قلت لكم جامعه مخيسه , واللي يقهر ما يقولون لنا وش هي الاسئلة اللي ما لها جواب , يعني لو استعملت قانون خطأ و طلع جوابك موب موجود مشكلة ما تدري هو ذا السؤال اللي ماله جواب ولا لا ؟! XD . 

     اكثر شيء كان ممتعني في الاختبار و ناسني هم الاختبار " صديق الطفولة " احسه كان شوي و يتحول وقف عند سؤال و جلس يحاول يحله و يضرب راسه و يحاول ويحاول حتى يئس و قرب نهاية الوقت و طلع XD . 

بعد الاختبار :

     الحمدلله خرجت و انا مطمئن شوي من الاختبار , و كل ما افتكر صديقي اضحك , بالذات يوم طلع السؤال اللي ضيع وقته عليه هو السؤال اللي ما له جواب XD . 

    بعد الاختبار صار اكشن شوي , صديقي اللي جت معه قال لي انه بيروح لبيت جدته بياخذ غرض من هناك و نرجع , وبيت جدته " مسكون " و انا ما كنت ادري , وصلنا لبيت جدته و قال لي " انتظر هنا في السيارة " هو نزل و طلع للبيت , بعد فترة كذا اتصل علي و قال لي " تعال اطلع " طفيت السيارة و انا داخل قلت " بسم الله توكلت على الله ولاحول ولا قوة الا بالله , اعوذ بكلمات الله التمات و من شر ما خلق " قلتها بدون ما اعرف انه البيت " مسكون " او اي شيء , قلتها عادي كذا بس , بعد ما طلعت الدور الثالث تقريبا لقيت صحبي وقال لي " ترا و انا ادخل سمعت اصوات " و المشكلة دخلنا البيت على اذان المغرب , يعني وقت طلوع الجن , و الحمدلله اخذنا الغرض و مشينا بسرعه XD . 


النهاية ........... . 


الموضوع الجاي ان شاء الله " الاختبار التحفة #6 "