بسم الله الرحمن الرحيم
اختبار التحفة " حاسب " الدوري الثاني ........ .
مدري بس جامعتي مخيسه وستظل مخيسه ، اختبار الحاسب مسوينه على الايباد يعني تطور و كذا " حمقى " ، انا ما انكر اني سبق وقلت لو يحطون فلوس الايباد في المكافاة يعني يزودون المكافأة شوي , بس بعد التفكير لو ياخذون فلوس الايباد و يجيبون دكاترة يفهمون و يُفهمون الطلاب يكون احسن لنا و لهم بدل الدكاترة اللي عندنا .... استغفرالله بس , صح انه في دكاترة يفهمون بس أقلية اللي هم كذا :( .
قبل الاختبار :
احس انه في كمية نحس تنزل علي ايام الاختبارات ، كل قبل اختبارات نهائية او دورية لازم يصير لي شيء كذا ينكد علي ، قبل الدوري الاول سويت حادث و قبل الدوري الثاني بعد سويت الحادث ، و كل حادث اقوى من اللي قبله , الله يستر من الاختبارات النهائية XD ، الحادث قصة و الاختبارات قصة ثانية .
اختباري للحاسب كان الساعه ثلاثة الظهر ، رحت خلصت اوراق الحادث و كل شيء الساعه 12 الظهر وشوي مع الطريق و الزحمة وصلت للبيت الساعه وحدة الظهر ، و لازم احرك من البيت قبل الاختبار بنص ساعه ، و بستحم و...و... اشياء كثيرة كنت بسوها ، المهم مع تنظيم " وقتي الخنفشاري " ، ما كان فيه وقت للمذاكرة تقريبا الا " ساعه الا ربع " و الاختبار فصلين ، و طويل شوي ، و اللي يقهر اكثر انه اختبار الحاسب النظري تجي فيه اسألة عن الجزء العملي ، " جامعه مخيسه " , المهم الحمدلله مع القفز و التطنيش و مجموعة من الجمل الجميلة و المحفزة " ذا سهل ... ذا سخيف ما بيجي في الاختبار ..... ما له داعي .... " قدرت اخلص المذاكرة في الوقت المحدد XD .
وقت الاختبار :
مثل الدوري الاول ، نحن ثلاثة لكل اختبار التوصيلة على واحد من الثلاثة ، بس في اختبار الحاسب نكون اثنين و الثالث بعدنا على طول , في ذا الاختبار كانت التوصيلة علي ، وصلنا لمكان الاختبار حسب الوقت المتوقع ، انتظرنا شوي و نزلنا من السيارة قبل الاختبار ب خمس دقايق ، وصلنا لعند البوابة و نتفاجأة بالزحمة و الباب مقفل بعد ، سالنا واحد " وش المشكلة ؟! " , جاوب بجاوب حسيت كاني في محل اتصالات و لا بنك " النظام انخرب " , هذه اخرة الحركات و التقنية سحقا لهم لو يخلون الاختبار على ورق يكون احسن نختبر و نفتك منهم .
انتظرنا في الجو الحار و الشمس ما يقارب " خمسة وثلاثين دقيقة " انا كنت توني مستحم و ذلحين عرق وقرف خلاص كرهت نفسي ما كان مصبرني الا صحبي ( موب اللي وصلته واحد ثاني ) كنا نتكلم عن الانميات و كذا , نتكلم عن انمي فجاة نغير لانمي ثاني :") , بعد الخمسة وثلاثين دقيقة بدوا يفتحون البوابة و غير كذا ما فيه الا قاعه وحدة بس , دخلت القاعه , ما في خمسة دقايق الا وينقلونا لقاعه ثانية ولا بعد ما جلسنا و اخذنا الايباد يقولون لنا " اذا ما اشتغل سوي كذا و كذا ..... " .
بدأ الاختبار و كان اول سؤال غبي ما له حل قلت خلني أأجله , و انا اكره لما يجيني اول سؤال في اختبار و ما اعرف احله , احس بتوتر اكثر وقلق , المهم كملت و خلصت الحمدلله قبل لا اسلم الايباد سالت احد المراقبين عن السؤال الاول وقال لي جاوب اي شيء وبتاخذ درجته , جاوبت عليه اي شيء و سملت لهم الايباد و انا احس ودي اكسرهم هم على الايباد حقهم .
بعد الاختبار :
بعد الاختبار صراحه ما كان فيه شيء مميز , بس الحلوه انه قابلنا صاحبنا الثالث نحن تونا مخلصين الاختبار و هو اختباره توه يبدأ XD .
و الحمدلله الاختبار الاول انتهى على خير :) .
الموضع الجاي ان شاء الله بيكون عن " الاختبار التحفة #5 "
ليست هناك تعليقات:
إرسال تعليق