بسم الله الرحمن الرحيم
امممم , ح اكتب عن موضوعين او موقفين ذي المرة , كلها صارت في الاجازة موقف في الاجازة ذي اللي مضت , اللي كانت نصف الترم الثاني , و الثاني مجرد فكرة عابرة حبيت اطبقها و استمتع بها :) , ح ابدا بالاحدث ثم الاقدم .
الأول :
موقف حصل لي في الاجازة , كان بامكاني اني اخله يعدي ولا كانه شيء او اني اكبر السالفه شوي , و انا اخترت اني اكبر السالفه XD , مدري يمكن من الطفش اللي كنت فيه و كنت مختم كل شيء و حبيت اسوي شيء جديد , طبعا انا اعشق اجرب الافكار الجديدة و التجارب في الحياة :) .
في يوم من الايام الجميلة بعد ما انتهت الاختبارات الحقيرة الحمدلله , اختي حبت تروح للسوق في شارع التحلية اتوقع انه كان " دبنهامز " و التحلية معروف عنه انه زحمة و كذا , سألت اختي اذا كانت بتطول , قالت لي لا بشوف شيء بسرعه و خلاص , قلت لها اجل خلاص بنزلك و اخذ لفة اذا لقيت موقف نزلت معك و اذا ما لقيت ح انتظرك في السيارة بعيد عن المحل و لما تخلصين اتصلي بي , المهم نزلت اختي و اخذت لفة طبعا ما لقيت موقف وقفت بعيد و انا انتظر اختي في السيارة جلست شوي طفشت , قلت خلني اشغل اغنية ( الله يسامحني ) , المهم شغلت اغنية في الحقيقة هو كان فيديو لانمي وفيه اغنية , كنت ارفع الصوت بالتدريج شوي شوي حتى وصلت اعلى مستوى يعني الصوت صار يخرج من السيارة , و انا مستمتع و منسجم مع الاغنية جاءه واحد ملتحي و مسواك و ثوب قصير قلت اكيد ذا بيقول لي شيء مر بجنمب السيارة كان يمشي موب بالسيارة , و هو يمشي يناظر في بنظره لا توصف انا ما عجبتني نظرته لي , المهم حطيت عيني بعينه , قلت في نفسي ما لك داعي تناظر وما تقول لي ولا شيء على الاقل اشر بيدك انه اخفض الصوت او اي شيء , خفضت الصوت و نزلت من السيارة انتبه لي بس ما وقف , قلت له " عفوا لو سمحت ممكن دقيقة ؟! " سلمت عليه و كيف حالك و .... و ... , قلت له " اترى المنكر بعينك و تسمع باذنك و لا تفعل شيء ؟! , تخيل لو انك مت الان و انت لم تنصح اخاك المسلم , لماذا ؟! " >> اسئلتي كانت بالعامية موب بالفصحى , القيت عليه محاضرة بدل ما هو يلقي علي XD و ختمت كلامي بآية قرانية ( كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ ) " سورة آل عمران آية 110 " الآية ما قلتها لاني كنت حافظها او شيء مع اني كنت اتمنى لو كنت حافظها بس جبتها عن طريق برنامج بالجوال , بعد ما خلصت انتبهت لوجهه كنت بموت ضحك شكل وجهه كان لا يوصف صراحة XD , رد علي بكلام كان مثل وجهه الاحمق قال لي " كنت اعرف انك بتسكر الاغاني " , رجعت له نظرته و طنشته , و لو كان بيدي كان سدحته ارضا :) .
الثاني :
كنت طفشان و كذا , جات في بالي فكرة اسوي فديوهات و ارفعها على اليوتيوب بس ما كان فيه دعم و ما كان عندي استعداد تام بالذات بعد ما خضت تجربتي المخيسة مع اليوتيوب ( سبق و كتبت عنه ) فقلت بسوي شيء و اخله مجرد شيء عابر في حياتي :) .
يوم من ايام الاجازة الصيفية الجملية بعد ما خلاص تفرجت انميات و افلام و مسلسلات , قلت لنفسي خلني اجرب شيء , جات في بالي فكرة انه خلني اشوف كيف بتكون نظرة الناس لشيء لما يكون غريب او نادر يعني , اهلي كانوا يبون غذاء من كنتاكي و ماكدولندز , قلت لهم طيب , خرجت من البيت و اخذت سماعاتي , انا ما احب السماعات الصغيرة اللي تجي مع الجوال احسه غبية و غير مريحة اخذت معي سماعاتي الخاصة هي نوعا ما ملفتة و كبيرة شوي بس مريحة وشكلها جيد , صراحه كنت انا اساسا مشغل قرآن للقارئ " ماهر المعيقلي " ماشاء الله عليه يعجبني صوته , المهم نزلت من السيارة دخلت كنتاكي طلبت منه و خلصت , كنت واقف انتظر الطلب يجي و انتهبت لرجالين جالسن مع بعض في طاولة وحده , واحد كان ملتحي و بفمه مسواك ماشاء الله و الثاني كان عادي كانوا ينتظروا دورهم عشان يستلمون طلبهم , انتبهت للمطوع انه كان يطالع في شوي و يرجع يكلم اللي معه و ينظر لي بنظرة احتقار , قلت عادي , كانت الطاولة اللي بجنمبهم فاضية قلت خلني اجلس , شغلت برنامج القرآن اللي معي و بحثت عن آية , لقيت الآية اللي كنت ابحث عنها , جلست بالطاولة اللي بجنمهم و ظهري صار بظهر الرجال المطوع نزلت السماعات و حطيتها على رقبتي و رفعت الصوت كله , حتى صار اللي يمشي بجنمبي يسمع , شغلت الآية ( يَا أَيُّهَا الَّذِينَ آمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَبْ بَعْضُكُمْ بَعْضًا ۚ أَيُحِبُّ أَحَدُكُمْ أَنْ يَأْكُلَ لَحْمَ أَخِيهِ مَيْتًا فَكَرِهْتُمُوهُ ۚ وَاتَّقُوا اللَّهَ ۚ إِنَّ اللَّهَ تَوَّابٌ رَحِيمٌ ) , طبعا ماصار شيء بعد ما سمع و لا حتى التفت لي , اهم شيء سويت اللي براسي , رجعت حطيت السماعات خفضت الصوت و جلست ع الجوال انتظر طلبي :) .
النهاية ...........
الموضوع الجاي ان شاء الله ح اكتب عن " اين ذهبت يا أخي ؟! "
ليست هناك تعليقات:
إرسال تعليق